فرۆشتنی دوایین ئیمزاى (جۆن كه‌نه‌دی ) به‌ 39 هه‌زار دۆلار

شڤان گۆران ... دوایین ئیمزاى سه‌رۆكی پێشووتری ئه‌مه‌ریكا جۆن كه‌نه‌دی كه‌ پێش چه‌ند كاتژمێرێك له‌ تیرۆركردنی كردوویه‌تی له‌ مه‌زادێكی ئاشكرا له‌ هه‌رێمی تكساس به‌رامبه‌ر 39 هه‌زار دۆلار فرۆشرا .

تۆری "سی ئێن ئێن" ی ئه‌مه‌ریكی رایگه‌یاند كه‌ كه‌نه‌دی له‌سه‌ر لاپه‌ڕه‌ى یه‌كه‌می رۆژنامه‌ى " دالاس مۆرنینگ نیوز " كه‌ وێنه‌یه‌كی خۆی و هاوسه‌ره‌كه‌ی تێدابووه‌ ، له‌سه‌ر داواى ئافره‌تێك له‌ تكساس ئه‌م ئیمزایه‌ی كردووه‌ .

هه‌روه‌ها ئاماژه‌ی به‌وه‌كرد كه‌ به‌رواری تیرۆر كردنی كینێدی له‌دواى نزیكه‌ى دوو كاتژمێر له‌ لاپه‌ڕه‌ى یه‌كه‌می رۆژنامه‌كه‌ له‌ ته‌نیشت ئیمزاكه‌یه‌وه‌ نووسراوه‌ .

دۆگ نۆروین یه‌كێك له‌ به‌رێوه‌به‌رانی كۆشكی مه‌زادی ئاشكرا ده‌ریخست كه‌ رۆژنامه‌كه‌ مانایه‌كی گرنگی مێژوویی هه‌ڵده‌گرێ چونكه‌ به‌ به‌ڵگه‌وه‌ كات و شوێنی تیرۆر كردنی جۆن كێنێدی دیاری ده‌كات سه‌ره‌راى ئه‌وه‌ش یه‌كێكه‌ له‌ دواترین واژووی ئه‌و.

رۆژنامه‌كه‌ش به‌رامبه‌ر 39 هه‌زار دۆلار به‌ (جۆن مادالینا) سه‌رۆك و خاوه‌نی كۆمپانیای " كه‌سایه‌تییه‌كانی مێژوو " فرۆشرا كه‌ ناوبراو نامه‌ و ئیمزا و یاده‌وه‌رییه‌كانی كه‌سانی ناوبانگ كۆده‌كاته‌وه‌ و باره‌گاكه‌ى له‌ شاری (كالاباساس )ـه‌ له‌ كالیفۆرنیا .

وێنابوونی شێوه‌ی قازێك له‌ (ته‌رۆزی) دا

شڤان گۆران ... زۆر جار له‌ سروشتدا شتی سه‌یرو سه‌مه‌ره‌ و سه‌رنجڕاكێش ده‌بینین ، بۆیه‌ له‌یه‌كێك له‌ گونده‌كانی سه‌ر به‌قه‌زاى به‌رده‌ڕه‌ش جووتیارێك له‌كاتی لێكردنه‌وه‌ى به‌رهه‌می باخچه‌كه‌ى ته‌رۆزییه‌كی زۆر سه‌یری به‌رچاوكه‌وت كه‌ زۆر هاوشێوه‌یه‌ له‌ قاز ..!

وه‌ك له‌وێنه‌كه‌دا ئاشكرایه‌ ته‌رۆزییه‌كه‌ هاوشێوه‌ى قاز گه‌ردنێكی درێژ و ته‌نانه‌ت چاوو ده‌نووكیشی له‌خۆدا وێناكردووه‌ .

ئافره‌تێك داواى ته‌ڵاق له‌ مێرده‌كه‌ی ده‌كات چونكه‌ ناوى به‌ ( گوانتانامۆ) له‌ مۆبایله‌كه‌یدا نووسیوه‌

شڤان گۆران .. ئافره‌تێكی سعودی داواى ته‌ڵاقی له‌مێرده‌كه‌ی كرد دواى ئه‌وه‌ی زانی كه‌ ناوی له‌ مۆبایلی مێرده‌كه‌ی به‌ ( گوانتانامۆ ) نووسراوه‌ . به‌پێی هه‌واڵی رۆژنامه‌ى وه‌ته‌نی سعودی ئه‌و ئافره‌ته‌ كاتێك به‌وه‌ی زانی ناوی له‌ مۆبایلی مێرده‌كه‌ی ( گوانتانامۆ ) یه‌ كه‌ به‌رێكه‌وت مێرده‌كه‌ی مۆبایلی خۆی له‌ماڵه‌وه‌ جێهێشتبوو و ئه‌ویش هه‌وڵی دا په‌یوه‌ندی پێوه‌ بكات به‌ڵام بینی مۆبایله‌كه‌ی له‌ ماڵه‌وه‌ زه‌نگ لێده‌دات بۆیه‌ كه‌ سه‌یری كرد شۆك بوو .رۆژنامه‌كه‌ ده‌ریشی خست كه‌ " ئافره‌ته‌كه‌ " زوو به‌زوو ده‌چێت داواى ته‌لاقی له‌مێرده‌كه‌ى ده‌كات و پێی وابوو كه‌ ناونانی به‌م ناسناوه‌ له‌ مۆبایلی پیاوه‌كه‌ی وه‌ها ده‌گه‌یه‌نێ كه‌ وه‌ك دڕنده‌یه‌ك وایه‌ و مامه‌ڵه‌ى له‌گه‌ڵدا ناكرێت یانیش ده‌سه‌لاتداره‌ به‌سه‌ر مێرده‌كه‌یدا . ئافره‌ته‌كه‌ دووپاتیشی كرده‌وه‌ كه‌ ئه‌وه‌ى مێرده‌كه‌ى له‌دواى 17 ساڵ له‌ژیانى هاوسه‌رگیری ئه‌نجامی دا ( لاواز كردنی پێگه‌ی منه‌ و بۆیه‌ سووڕم له‌سه‌ر جیابوونه‌وه‌ ، یانیش ده‌بێت ئه‌و پیاوه‌ بڕه‌ پاره‌یه‌ك وه‌كو سزا ببه‌خشێت بۆ ئه‌وه‌ى بزانێ كه‌ هه‌ڵه‌ى كردووه‌ و چیدیكه‌ دووباره‌ى نه‌كاته‌وه‌ ) .هه‌رچی پیاوه‌كه‌شه‌ ده‌لێت كه‌ ئه‌و به‌هیچ مه‌به‌ستێك ئه‌م ناوه‌ى به‌كارنه‌هێناوه‌ ته‌نها بۆ پاراستنی تایبه‌تمه‌ندێتی و نهێنی خێزانییه‌ وه‌ بۆ ئه‌وه‌ بووه‌ كه‌ ئه‌وانه‌ى كه‌ له‌گه‌ڵیدان نه‌زانن ئه‌وه‌ خێزانییه‌تی كه‌ ته‌له‌فۆنی بۆ ده‌كات .

منداڵێكی 2 ساڵه‌ ئاستی زیره‌كییه‌كه‌ى له‌هی ئه‌نیشتاین نزیك ده‌بێته‌وه‌

شڤان گۆران ،، رێكخراوى " مێنسا " بۆ خاوه‌ن زیره‌كییه‌ ئاست به‌رزه‌كان ، پێشوازى له‌ منداڵێكى ته‌مه‌ن 2 ساڵ و 5 مانگ كرد به‌ناوى ئۆسكار ویرگلی كه‌ ئاستێكی زۆر به‌رزى بلیمه‌تى و زیره‌كی هه‌یه‌ له‌چاو ئه‌و ته‌مه‌نه‌ بچووكه‌ی ، به‌پێی زانیاری ئه‌م رێكخراوه‌ ئاستى زیره‌كی منداڵه‌كه‌ ده‌گاته‌ 160 پله‌ به‌مه‌ش له‌ پله‌ى زیره‌كی و بلیمه‌تی زاناى به‌ناوبانگ " ئه‌لبێرت ئه‌نیشتاین " نزیك ده‌بێته‌وه‌ .
دایك و باوكی ئۆسكار رایانگه‌یاند كه‌ ئه‌و حه‌زى له‌ خوێندنه‌ له‌باره‌ى ژیانی سروشتی ، و مێژوو و جوگرافیای رۆمای كۆن و حه‌زی له‌ یاریكردن نییه‌ ، و ئه‌م منداڵه‌ش له‌ مانگی نۆیه‌مه‌وه‌ ده‌ستی به‌ قسه‌كردن كردووه‌ و له‌كاتى گه‌یشتنی به‌ مانگی 18 فێری پیته‌كان بووه‌ ، وه‌ خۆشحاڵی خۆیان ده‌ربڕی به‌وه‌ى منداڵه‌كه‌یان ئه‌م به‌هره‌ نایابانه‌ى هه‌یه‌ .

هه‌روه‌ها ئاماژه‌یان به‌وه‌كرد كه‌ كاتێك ئۆسكار ساڵی دووه‌می ته‌مه‌نی ته‌واو كرد هه‌زاران وشه‌ فێرببو، له‌كاتێكدا هاوته‌مه‌نه‌كانى نه‌یانده‌توانی زیاتر له‌ 50 ووشه‌ به‌كاربێنن ، بۆیه‌ به‌ڕای ئه‌وان به‌رپرسیارییه‌تێكی گه‌وره‌ كه‌وتۆته‌ ئه‌ستۆیان بۆ دابینكردنی لایه‌نی فێركردنی گونجاو بۆی .
دایك و باوكی ئۆسكار هه‌ردووكیان ئاستێكی ئاساییان له‌ زیره‌كیدا هه‌یه‌ ، به‌ڵام خاڵێكی ئۆسكار ئاستێكی نایابی هه‌یه‌ و له‌ ساڵی 1995 له‌ ته‌مه‌نی 13 سالیدا ده‌ستى به‌ خوێندن كردووه‌ بۆ وه‌رگرتنی بڕوانامه‌ی زانكۆیی له‌ بوارى كۆمپیوته‌ر.

پیاوانیش ده‌گریێن ، به‌ڵام كه‌متر له‌ ئافره‌ت.!

شڤان گۆران .. توێژینه‌وه‌یه‌كى نوێی زانستى ده‌ریخستووه‌ كه‌ پیاوان هه‌رچه‌نده‌ له‌ رووخسارى ده‌ره‌وه‌یان وا ده‌رده‌كه‌ون كه‌ بوونه‌وه‌رێكی پته‌ون به‌ڵام له‌ ناوه‌دا ئه‌وانیش ناسكن . پزیشكانى كۆمه‌ڵه‌ی ئه‌لمَانی بۆ پزیشكی چاو له‌ میونیخ ده‌لێن پیاوانیش هه‌ندێ جار ده‌گریێن و له‌وانه‌یه‌ له‌ساڵێكدا ئه‌م حاڵه‌ته‌یان بگاته‌ 17 جار . به‌ڵام به‌بێ گومان ئافره‌ت له‌م شته‌دا پێش پیاو ده‌كه‌وێت و له‌ساڵێكدا له‌وانه‌یه‌ 64 جار فرمێسك له‌چاوه‌كانیدا بڕژێن ، واته‌ نزیكه‌ى چوار ئه‌وه‌نده‌ى پیاوان . توێژینه‌وه‌ زانستییه‌كه‌ ده‌ریخست كه‌ كوڕ و كچ پێش ته‌مه‌نی 13 ساڵی به‌هه‌مان ئاست ده‌گریێن به‌لام دواى ئه‌وه‌ بارودۆخه‌كه‌ گۆڕانكاری به‌سه‌ردا دێت و پیاوان 6 تا 17 جار و ئافره‌تان 30 تا 64 جار له‌ ساڵێكدا ده‌گریێن . نه‌ك ته‌نها به‌ ژماره‌ ئافره‌تان له‌پێش پیاوانن ، به‌لكو له‌ ماوه‌ی گریانیش ، چونكه‌ به‌پێی ئه‌م توێژینه‌وه‌یه‌ ئاستى مامناوه‌ندی ماوه‌ى گریانى ئافره‌ت به‌ شه‌ش خوڵه‌ك خه‌ملێنراوه‌ له‌كاتێكدا پیاوان ته‌نها بۆماوه‌ى چوار خوڵه‌ك فرمێسك ده‌ڕێژن .

مۆبایل له‌ ژوورى نووستندا مه‌ترسیداره‌

شڤان گۆران .... كۆمه‌ڵێك له‌ پزیشكانى فه‌ره‌نسا داوایان كرد كه‌ وا باشتره‌ مۆبایل دوور له‌ له‌شی مرۆڤ رابگیرێت و له‌ ژوورى نووستنیشدا دانه‌نرێت . ئه‌و پزیشكانه‌ رایانگه‌یاند كه‌ پێویسته‌ مۆبایل هه‌موو كات 2 سه‌نتیمه‌تر زیاتر له‌ له‌شی مرۆڤه‌وه‌ دوور بێت و داوایان كرد كه‌ له‌كاتى نووستندا دابخرێت و له‌دوورى 50 سه‌نتیمه‌تر له‌ له‌شدا دابنرێت ، چونكه‌ به‌ڕای ئه‌م پزیشكانه‌ دانانی مۆبایل له‌ نزیك له‌ش چه‌ند زیانێكی ته‌ندروستی بۆ مرۆڤ هه‌یه‌ وه‌كو تێكچوونى خه‌و و سه‌رئێشه‌ و لاوازى له‌ ته‌ركیز كردن و خه‌مۆكی . پیر سوفی سه‌رۆكی كۆمه‌ڵه‌ى ته‌ندروستی و ژینگه‌ له‌ فه‌ره‌نسا دووپاتى كرده‌وه‌ كه‌ چه‌ندین توێژینه‌وه‌ ئه‌وه‌یان ده‌رخستووه‌ مۆبایل چه‌ندین كاریگه‌رى فسیۆلۆژی و بایه‌لۆژی هه‌یه‌ له‌سه‌ر به‌كارهێنه‌رانی و ده‌شبێته‌ هۆى دابه‌زاندنی هۆرمۆنی خه‌وتن به‌ناوى " میلاتونین " ، ئه‌م هۆرمۆنه‌ش تایبه‌تمه‌ندی دژه‌ شێرپه‌نجه‌ی هه‌یه‌ . ناوبراو روونی كرده‌وه‌ كه‌ توێژینه‌وه‌كانى پێشوو ده‌ریانخستووه‌ گۆڕانگاریی له‌ لێدانه‌كانى دڵ روویداوه‌ له‌و كاته‌ى كۆرپه‌له‌ یان منداڵی راسته‌وخۆ دواى له‌دایك بوون بۆ ماوه‌ى 10 خووڵه‌ك رووبه‌رووى شه‌پۆڵه‌كانى مۆبایل بكرێنه‌وه‌ .

به‌هۆى سووتاندنى نامه‌ى خۆشه‌ویسته‌كه‌ی 18 مانگ زیندانی و یه‌ك ملیۆن و 200هه‌زار یۆرۆش سزا درا

شڤان گۆران .. كریستیان گارسیاى ته‌مه‌ن 25 ساڵ كه‌ گه‌نجێكی ئیسپانییه‌ هه‌رگیز چاوه‌ڕوانی ئه‌وه‌ى نه‌ده‌كرد كه‌ سووتاندنى نامه‌كانى ئه‌و خۆشه‌ویسته‌ى كه‌ جێی هێشتبوو ببێته‌ هۆى به‌ندكردنى بۆماوه‌ى 18 مانگ و سزادانیشی به‌ ملیۆنێك و 200 هه‌زار یۆرۆ ، به‌لام ئه‌مه‌ روویدا ,, دواى هاتنه‌ كایه‌وه‌ی چه‌ند كێشه‌یه‌ك له‌گه‌ڵ خۆشه‌ویسته‌كه‌ی كه‌ بڕیاری پچراندنى په‌یوه‌ندی له‌گه‌ڵ دابوو ، له‌پێش ده‌رگاى ماڵه‌وه‌ وه‌ستا و گشت نامه‌كانى سووتاند ، به‌لام له‌ به‌دبه‌ختی خۆى ئه‌م نامانه‌ى فڕێدایه‌ ناو سندوقی زبڵ له‌كاتێكدا هێشتا گڕی پێوه‌ مابوو ، له‌ ئاكامدا بووه‌ هۆى گڕگرتنى سندووقی زبڵه‌كه‌ و دواتر سووتاندنی دره‌خته‌كانى ده‌وروبه‌ر ، پاشان له‌به‌ر به‌هێزی هه‌وا له‌ ناوچه‌كه‌ ئاگره‌كه‌ ناوچه‌یه‌كی به‌ رووبه‌رى 1900 هیكتار له‌ دارستاندا گرته‌وه‌ و زۆر له‌و خێزانانه‌ى نزیك شوێنه‌كه‌ نیشته‌جێبوون زیانیان پێكه‌وت و ناچاربوون ماڵی خۆیان جێبهێڵن .

سه‌ره‌راى ئه‌مه‌ش ئاگره‌كه‌ بۆ ماوه‌ى سێ رۆژ به‌رده‌وام بوو ،و به‌هۆیه‌وه‌ به‌نده‌رى گاندیاى نزیك ئه‌م دارستانه‌ تووشی داخستن بوو ، و كوژاندنه‌وه‌كه‌شی به‌ ده‌ستێوه‌ردانی سوپا و فرۆكه‌ى تایبه‌ت كۆتایی هات به‌لام دواى ئه‌وه‌ى 1900 هیكتار له‌ دارستان و چه‌ند ناوچه‌یه‌كى به‌رفراوانی له‌ هه‌ریه‌كه‌ له‌ شارۆچكه‌كانى سیمات و بنیڤاریۆ و گاندیا و شریسا و شیراكۆ و پارس گرته‌وه‌ .

به‌پێی ئاماری حكومه‌تى مه‌حه‌لی له‌ په‌لنسیه‌ ،كۆى زیان و تێچوونی كوژاندنه‌وه‌ى ئاگره‌كه‌ گه‌یشته‌ 195000 یۆرۆ ، بۆیه‌ش دادگای ژماره‌ 2 له‌و شارۆچكه‌یه‌ بڕیاریدا ئه‌م گه‌نجه‌ به‌دبه‌خته‌ به‌ بڕی ملیۆنێك و 200 هه‌زار یۆرۆ سزا بدات و ساڵ و نیوێكیش له‌ زینداندا بمێنێته‌وه‌ .

پیاوێك 19 ساڵ به‌بێ بڕوانامه‌ كاری پزیشكی مندالان ده‌كات

شڤان گۆران .. پیاوێك له‌ شارى میلانۆى ئیتاڵی به‌ درێژایی 19 ساڵ به‌بێ ئه‌وه‌ى هیچ بڕوانامه‌یه‌كى زانكۆیی هه‌بێت له‌م بواره‌وه‌ كاری پزیشكی مندالان ده‌كات .

سه‌رچاوه‌كانی هه‌واڵ ده‌ریانخست كه‌ له‌میانه‌ى پشكنینێكی رۆتینی ده‌ركه‌وت به‌لگه‌نامه‌كانى ئه‌م پیاوه‌ كه‌له‌ نه‌خۆشخانه‌یه‌كی شارى میلانۆ و هاوكات عیاده‌یه‌كی تایبه‌تیشی هه‌بوو ناڕاستن و دواجار فێڵه‌كه‌ى ئاشكرا كرا .

دواتر ده‌سه‌لات داواى له‌ پزیشكه‌كه‌ كرد كه‌ روونكردنه‌وه‌ له‌باره‌ى به‌لگه‌ نامه‌كانی بدات ، به‌لام له‌جیاتى ئه‌مه‌ ئه‌و پزیشكه‌ وتارێكی ئاراسته‌ى ده‌سه‌لات كردبوو كه‌تیایدا بڕیاری ده‌ست له‌كاركێشانه‌وه‌ى خۆى راگه‌یاندبوو دواى ئه‌وه‌ به‌ته‌واوى خۆى ون كرد .

دواى ئه‌وه‌ لایه‌نه‌ په‌یوه‌ندیداره‌كان بۆیان ده‌ركه‌وت كه‌ ئه‌م پزیشكه‌ ته‌نها شه‌ش تاقیكردنه‌وه‌ى له‌ كۆلیژه‌كه‌ى خۆى تێپه‌ڕاندووه‌ و بڕوانامه‌ى زانكۆی به‌هیچ شێوه‌یه‌ك وه‌رنه‌گرتووه‌ .

به‌لام سه‌ره‌ڕاى ئه‌مه‌ ئه‌و مندالانه‌ى كه‌ ئه‌م پزیشكه‌ چاره‌سه‌رى بۆ كردبوون به‌ پزیشكێكی به‌توانا و رووخۆشیان له‌قه‌ڵه‌م دا و ئه‌وه‌یان ده‌رخست كه‌ ئه‌و گرنگیی زۆرى به‌ مندالان ده‌دا .